තේ කොල ගෙනා හැටි

මගේ සීයගේ ගුරු ජීවිතේ කතන්දර ගොඩාක් තියනවා. හුඟක් ඒවා හෆොයි තමයි, මේ කතාව සීයට උන එකක් නම් නෙවේ මගේ තාත්තට උන එකක්.. (සීයා කියන්නේ මගේ තාත්තගේ තාත්තනේ)

සීයා මුල්ගුරුතුමෙක් නිසා කාලෙන් කාලෙට මාරු වීම් ලැබෙනවා. ඉතිං අපේ තාත්තලත් එත් එක්ක යන්න ඕනි.

ඉස්සර මම පොඩි කාලේ අහනවා "තාත්තා කොයි ඉස්කොලෙටද ගියේ" කියලා.
තාත්තා කියනවා "ගොඩකට ගියා" .
එතකොට මං අහනවා "කීයකට ගියාද?"
එතකොට තාත්තා කියනවා "මට මතක නෑ" .
මං එතකොට හිතිං හිතනවා "බොරු වෙන්න ඇති" .
දැන් තමා තෙරෙන්නේ

කොහොමහරි මේ කියන කාලෙදි සීයා උගන්වලා තියෙන්නේ මදුරුපිටියේ ,

මිරිගමට ආසන්න බොහොම ලස්සන ගම්මානයක්..

ඉතිං මේ වෙනකොට තාත්තට අවුරුදු අටක් විතර කාලේ.
එක දවසක් උදේක සුදුඅම්මා(තාත්තගේ අම්මා)තාත්තට කීවලු..
"පුතා කඩේට හිගින් තේකොළ ටිකක් අරං එන්න"
කියලා

තාත්තල ඉඳලා තියෙන්නේ ඉස්කෝලේ ගුරු නිවාසේ. හැම ඉස්කෝලෙම වගේ ගුරු නිවසේ තමා තාත්තලා ඉඳලා තියෙන්නේ.

කොහොම හරි මේ ගුරු නිවාසෙට අල්ලපු වැටේලු කඩේ තිබිලා තියෙන්නේ. අඩි දෙකෙන් කඩේ.. (shortcut) හැබැයි හරි විදිහට නම් කඩේට යන්න වටයක් යන්න තිබිලා තියනවා.

තාත්තට සුදුඅම්මා කියපු එක ඇහුන ගමං හිතුනලු කඩේට බසිකලෙන් යන්න..

මොකද ඊට ඉස්සරින් දවසේ තමයි තාත්තා ඉස් ඉස්සල්ලාම බයිසිකලේ පොල්ලට උඩින් කකුල දාලා
පදින්න පුරුදු වෙලා තියෙන්නේ.. එහෙම පුලුවන්ය කියලා කට්ටියට පෙන්නනත් එපෑ.

ඔය ටික කල්පනා උන ගමං තාත්තා බයිසිකලේ අරං රුං ගාල ඉගිල්ලුනාලු කඩේ දිහාවට..

ඉතිං යනගමං එක එක වැඩ ඔලුව උස්සගන යනවා

පාත් කරගන යනවා..

කකුලක් උස්සගන යනවා..

ඇල වෙලා යනවා..

අප්පේ...

පොඩි මහත්තයා වැටෙයි. ඕක දකින ගැමියෙක් කියනවා

ඉතිං ඊට වඩා සතුටක් වෙන කොයින්ද?

හදිස්සියෙම තාත්තට අලුත් අදහසක් අවා..

අත් දෙක අතඇරල පැද්දොත් කොහොමද..


ගමේ තරමක ගැටවරයෝ එහෙම කරනවා එයා දැකලා තිබුනා.

ඉතිං දෙපාරක් නොහිතම තාත්තා අත් දෙක අතඇරියලු..

අතඇරියා විතරයි..
කොහෙදෝ තිබ්බ ගොඩැල්ලක් පැනපි බයිසිකලේ ඉස්සරහට..

අප්පේ..

තාත්තා උඩීං ගිහිං ඇමිනිච්චි කඩේ වැටේ..

කාට කියන්නද

අපොච්චියේ කව්ද බොලේ වැටුනේ..
කඩේ ලඟ උන්න සේරම වට උනා..

මේ ලොකුමහත්තයගේ පුතා නේද?

ගමේ කට්ටිට ඔලුව පහලට හිටින්ඩ වැටේ ඇමිනිලා හිටපු පොඩි මහත්තයව ගලවලා ගත්තා..

අප්පේ සර්වාන්ගෙම හිරිලා නේද මහත්තයෝ?

ඇහ්.. රිදෙන්නෙනෑ.

තාත්තා අමාරුවෙන් කියා ගත්තලු.

යමු ගෙදර කියල ගමේ කෙනෙක් වඩා ගත්තලු තාත්තව හරහට.

වස ලැජ්ජාවයි වැටේ ඇමිනුනා මදිවට හරහටත් යමංකෝ..

හෆොයි

මේ අතරේ තේකොල ගේන්න ගිය ලමයා හොයාගන ඉස්තොප්පුවට එනවලු සුදුඅම්මා..

තේකොලයි ලමයයි කෙසේවෙතත් පෙරහැරක්ම එනවා මොකෝ දන්නේ නෑ..
සුදුඅම්මා හිතුවා.

ඉස්කොලේහාමිනේ මේ පුතා වැටේ ඉඳලා අපි මේ එක්කං අවා..

ආ මං ඒත් බැලුවා කෝ කියලා..

මදැයි එක්කෙනෙක් තේකොල ගෙන්ඩ ඇරියා දැන් ඉත්ං තේකොලයි රත්හඳුන්නුයි දෙකම ගේන්ඩ වෙනවා..

සුදුඅම්ම එහෙම කියනකොටත් තාත්තා
පේන මානෙක උන්නේ නෑලු..